KIA Gullhringurinn á Selfossi um helgina
KIA Gullhringurinn er nú haldinn í tólfta sinn dagana 1. og 2. júlí en hann er sannarlega eitt stærsta og um leið skemmtilegasta hjólreiðamót landsins. Keppnin var fyrst haldin árið 2012 á Laugarvatni og hefur fyrir löngu skapað sér fastan stað í mótadagatali hjólreiðafólks. Nú er svo komið að á Selfossi er keppnin orðin tveggja daga viðburður.
Á laugardaginn er keppt í tveimur vegalengdum 59 km og 43 km vegalengd en í seinni vegalengdinni er boðið upp á þátttöku með og án tímatöku. Þannig geta vinahópar, saumaklúbbar og vinnustaðahópar hjólað saman á laugardagskvöldið 43 km hring sér til skemmtunar án tímapressu. Rafmagnshjól eru einnig velkomin í þá vegalengd og er hún hugsuð sem sameiginlegt skemmtimót allra sem hafa gaman af hjólreiðum en ekki bara þá sem skara fram úr í sportinu.
Allar vegalengdir mótsins á laugardag eru ræstar á Brúarstræti í Miðbæ Selfoss og koma svo í lokamark fyrir framan Mjólkurbúið og Mathöllina. Strax og þátttakendur koma í mark hefst Eftirpartý á Sviðinu, tónleikastaðnum í hjarta Miðbæjarins, og tilboð á mat og drykkjum verða fyrir þátttakendur og áhorfendur á flestum veitinga- og skemmtistöðum Miðbæjarins á laugardag. Allar verðlaunaafhendingarnar verða síðan í Eftirpartýinu á Sviðinu klukkan 20:30 en þangað eru allir velkomnir ekki bara þátttakendur.
Á sunnudaginn bjóða KIA og BYKO upp á fjölskylduhring þar sem hjólað er frá BYKO á Selfossi það sem Sunnlendingar kallar Votmúlahringinn og endað í pulsugrilli við BYKO. Leiðin er um 12 km en ekki er um keppni að ræða heldur svokallað samhjól þar sem allir aldurs- og getuflokkar hjóla saman sér til skemmtunar. Öll hjól, þar með talin rafmagnshjól, eru velkomin og fjölskyldur hvattar til að fjölmenna. Endað verður í pulsugrilli og tónlistaratriði á BYKO planinu á Selfossi þar sem fulltrúar frá Sonax bóni verða mættir til að kenna öllum að þrífa hjólin, smyrja keðjurnar og bóna með nýrri hjólabónlínu frá þeim sem allir fá að prófa.
